Data:
12-18.07.2026.
Ora:
20:00
Info
Festivali i Animacionit Anibar, i vetmi festival i dedikuar këtij mediumi në Kosovë dhe një nga më të njohurit në rajon, na fton t’i bashkohemi vallëzimit të animacionit përgjatë lumit Lumbardh në Pejë, nga 12 deri më 18 korrik të këtij viti.
I lindur nga nevoja për të gjallëruar jetën kulturore dhe për të inkurajuar komunitetin artistik që të aktivizojë hapësirat e braktisura të qytetit, Anibar, pas 17 vitesh, i është afruar më shumë se kurrë përmbushjes së këtij misioni duke u rritur në program, audiencë dhe përgjegjësi.
Deri më tani, Anibar e ka përdorur platformën e tij për të reflektuar mbi gjendjet kolektive, në varësi të fenomeneve që na rrethojnë. Ekipi i festivalit ka qëndruar pranë publikut të tij përmes temave si Shpresat & Frikërat, Bestytnitë dhe Pasiguritë (WTF?!), nevojës për Çlirim dhe Përkatësi (Izolimi), DASHURISË dhe luftës për barazi (Shkatërro Patriarkatin).
Edicioni i ardhshëm nuk bën përjashtim, madje shkon edhe më tej. Nga temat e së kaluarës deri te ato që na preokupojnë sot, në vend që të fokusohemi vetëm në njërën prej tyre, këtë vit po i lejojmë ato të shfaqen përmes filmave të përzgjedhur që do të shfaqen në pesë kinema, në diskutimet me kineastë dhe mysafirë të festivalit, në punëtoritë dhe masterklasat e përshtatura për çdo mendje kureshtare, si dhe në ekspozita, piknikë dhe muzikë të ndarë mes miqsh.
Ndër të tjera, këtë vit festivali na fton të shkëputemi për pak çaste nga ritmi i botës digjitale, duke na kujtuar të jemi të pranishëm me njëri-tjetrin në kohë dhe hapësirë, si dhe me vetë procesin krijues. Gjatë gjithë festivalit, do të eksplorojmë marrëdhënien tonë me shqisat, natyrën, materialet dhe kujtesën.
Ndërsa programi i plotë i këtij viti do të zbulohet në ditët në vijim, ju ftojmë të zbuloni fragmente të festivalit përmes trailerit zyrtar të këtij edicioni, të realizuar nga animatorja finlandeze Jenny Jokela.
Nëse nuk keni qenë kurrë në Pejë, ky klip e sjell qytetin pranë jush në ngjyrat e tij më të gjalla; ndërsa për ata që e kanë vizituar, ju paralajmërojmë për valë nostalgjie.
